بۇل پىكىرتالاس الاڭى تەك كاسىبي جۋرناليستەرگە عانا ەمەس, ءتۇرلى قوعامدىق ۇيىمدار وكىلدەرىنە دە ويىن بولىسۋگە مۇمكىندىك بەردى.
«مەملەكەت بۇقارالىق اقپارات قۇرالدارىن قانشا باقىلايىن دەگەنمەن بۇگىنگى ينتەرنەت پەن الەۋمەتتىك جەلىلەر ىقپالى وعان تولىق مۇمكىندىك بەرە بەرمەيدى. سوندىقتان نە ىستەۋ كەرەك؟ بۇگىن بىزدە تۇڭعىش رەت وبلىستىق جانە رەەيدىڭ كورشى وبلىستارىنان بۇقارالىق اقپارات قۇرالدارىنىڭ وكىلدەرى, بەلگىلى بلوگەرلەر, جۋرناليستەر ۇيىمدارىنىڭ باسشىلارى جينالىپ, وسى سۇراققا تاعى دا جاۋاپ ىزدەپ, پىكىر الماسادى. بۇل وتە ماڭىزدى, ءبىزدىڭ ۇلتتىق قاۋىپسىزدىگىمىز عانا ەمەس, ەكى ەلدىڭ ىنتىماقتى قارىم-قاتىناسى دا اقپاراتتىڭ قالاي بەرىلۋىنە تاۋەلدى ەكەنىن ۇمىتپايىق» دەدى مەديا-فورۋمدى ۇيىمداستىرعان «قوستاناي-مەديا-حولدينگ» جاۋاپكەرشىلىگى شەكتەۋلى سەرىكتەستىگى ديرەكتورلار كەڭەسىنىڭ توراعاسى ماحاببات جۋتاەۆ.
فورۋمنىڭ پلەنارلىق ماجىلىسىندە كوممۋنيستىك حالىق پارتياسىنىڭ حاتشىسى دميتري لەگكي, ءو.سۇلتانعازين اتىنداعى قوستاناي مەملەكەتتىك پەداگوگيكا ۋنيۆەرسيتەتىنىڭ رەكتورى, پروفەسسور ەركىن ءابىل, وبلىستىق جۋرناليستەر ۇيىمىنىڭ توراعاسى سەرگەي حارچەنكو, «سودرۋجەستۆو» ءباسپاسوز كلۋبى ورتالىق ازيا باعىتىنىڭ رەداكتورى جاننا تولەندينوۆا, چەليابى وبلىستىق جۋرناليستەر وداعىنىڭ توراعاسى دەنيس مياكيشەۆ, قورعان وبلىستىق جۋرناليستەر وداعى توراعاسىنىڭ ورىنباسارى سۆەتلانا ەمەليانوۆا, ء«ادىل ءسوز» قورىنىڭ زاڭگەرلىك قىزمەتىنىڭ جەتەكشىسى تامارا سيماحينا, قازاقستان جۋرناليستەر وداعىنىڭ توراعاسى سەيىتعازى ماتاەۆ, تاعى باسقالار بۇگىنگى كاسىبي جۋرناليستيكا مەن الەۋمەتتىك جەلىلەردىڭ جۇمىسى, ىقپالى تۋرالى پىكىرلەرىن ورتاعا سالدى.
«الەۋمەتتىك جەلىلەر مەن بلوگەرلەردىڭ ءداستۇرلى بۇقارالىق اقپارات قۇرالداردان ايىرماشىلىعى, ولاردىڭ ءوزىنىڭ ءسوزىن تىكەلەي باعىتتايتىن اۋديتورياسى بولادى, ولار ءداستۇرلى باق-تان گورى بلوگەرگە سەنەدى. ەڭ قىزىعى, بلوگەردىڭ اۋزىنا قارايتىن اۋديتوريا ولاردىڭ اقپارات بەرۋدەگى جاۋاپكەرشىلىگىنىڭ, ءبىلىمىنىڭ دەڭگەيىنە قاراماي, ولارعا كاسىبي جۋرناليستەن جوعارى سەنەدى. ەندى سوڭعى 3-4 جىلدا ادامداردىڭ اقپارات الماسۋىنداعى مەسسەندجەرلەر ترەندى الەۋمەتتىك جەلىنىڭ ءوزىن ىعىستىرىپ بارا جاتقانداي. تەحنولوگيانىڭ جىلدام دامۋى ادامداردىڭ اقپارات الماسۋى ءۇشىن كومپيۋتەردى, تەلەۆيدەنيەنى, باسقانى دا كەرەك ەتپەي وتىر, ولارعا ۇيالى تەلەفون بولسا جەتىپ جاتىر. 2016 جىلى مەسسەندجەرلەردىڭ پايدالانۋى الەۋمەتتىك جەلىگە جەتىپ قالعانى تۋرالى اقپارات وقىعان ەدىم, ال بۇگىن ولار الەۋمەتتىك جەلىدەن اسىپ تۇسەدى. ەگەر قازىر «فەيسبۋكتى» ورتا جاستاعى بەلسەندى بۋىن پايدالانسا, «ۋاتساپتى» بەسىكتەگى بالادان بەلى بۇگىلگەن شالعا دەيىن پايدالانادى. الەۋمەتتىك جەلىلەردە بلوگەر كاسىبي بولماسا دا, ونىڭ ايتقان پىكىرلەرىنىڭ اۆتورى بەلگىلى بولادى, جۇرت ۋاقىتىسىندا پىكىر بىلدىرەدى. ال «ۋاتساپپەن» تاراعان اقپارات ۆيرۋسپەن بىردەي, ەگەر اقپارات قاتە بولسا, ونىڭ قايدان شىققانىن, اۆتورى كىم ەكەنىن ءبىلۋ مۇمكىن ەمەس» دەگەن ەركىن ءابىل مەسسەندجەرلەر ارقىلى تاراعان ءبىلىم جۇيەسىنە قاتىستى جالعان اقپاراتتاردان مىسالدار دا كەلتىردى.
فورۋمنىڭ پلەنارلىق ءماجىلىسىنىڭ وزىندە قىزۋ پىكىرتالاستار بولدى. تۇستەن كەيىن مەديا-فورۋمعا قاتىسۋشىلار «ساياسي تەحنولوگيا: باق جانە پارتيالار», «زاڭناما جانە باق, داۋ-دامايلار», «الەۋمەتتىك جەلىلەر جانە بلوگەرلىك ترەندتەرى» دەگەن تاقىرىپتاعى ءۇش سەكتسياعا ءبولىنىپ, جۇمىس ىستەدى.
فورۋم قوناقتارى قوستاناي قالاسىندا وتەتىن ناۋرىز مەرەكەسىنىڭ قىزىعىن تاماشالايدى.
ءنازيرا جارىمبەت,
«ەگەمەن قازاقستان»,
قوستاناي
